About Contact
०७ आश्विन २०७८, बिहिबार
Close
बिज्ञापन
धनुषामा दर्जनौँ विद्यालयमा अवैधानिक नियुक्ति, किर्ते गरी वडाध्यक्षको दाइलाई नियुक्ति

शिक्षक नियुक्तिमा जताततै विवाद, पालिकालाई पत्राचार

खोज केन्द्र आइतबार, साउन ०३, २०७८ मा प्रकाशित

featured photo: खोज केन्द्र

धनुषामा शिक्षक नियुक्तिमा विवाद देखिएको छ । जिल्लाका विभिन्न विद्यालयमा प्रधानाध्यापक र जनप्रतिनिधिको मिलोमतोमा प्रक्रियाविपरीत नियुक्ति गरिएको आरोप लागेको छ ।

बटेश्वर गाउँपालिका–४ स्थित शिवशक्ति माविमा नवनियुक्त १० जना शिक्षकको वैधानिक नियुक्ति नरहेको भन्दै स्थानीयले नियुक्ति रद्द गर्न माग गरेका छन् । तर, प्रधानाध्यापक गुरुशरण केवटले नियुक्ति वैधानिक रहेको दाबी गरेका छन् । सबै प्रक्रिया पुर्‍याएर नियुक्ति गरिएको उनले बताए । केही स्थानीयले विद्यालयमा राजनीति गर्न खोजेको उनको आरोप छ ।

उनका अनुसार गएको वैशाख १० गते विद्यालय व्यवस्थापन समितिको बैठकले शिक्षक थप गर्ने निर्णय गरेको थियो । वैशाख १६ गते १० शिक्षकका लागि आवेदन माग गरियो । जेठ ५ गते जिल्ला शिक्षा विकास तथा समन्वय इकाइको विज्ञ समूहले शिक्षक नियुक्ति गर्न अनुमति दिएको थियो ।

जेठ २९ गते जनकपुरमा आवेदक २७ जनाको परीक्षा लिइयो । कोरोना महामारीका कारण दुई समूह बनाएर परीक्षा लिइएको थियो । जेठ ३१ गते नतिजा प्रकाशन गरियो । असार १ गते छनोट भएका १० शिक्षक पदस्थापन भए ।

तर, विद्यालयका प्रधानाध्यापक र व्यवस्थापन समितिले आफन्तलाई नै नियुक्त गरेको स्थानीय राजकिशोर यादवले आरोप लगाएका छन् । विद्यालयमा प्रधानाध्यापकका छोरा केतनशरण, भान्जा प्रेमप्रकाश कापर, विद्यालय व्यवस्थापन समितिका अध्यक्ष गंगाप्रसाद साहकी छोरी प्रियंकाकुमारी साह र समिति सदस्य हरि साहकी छोरी मञ्जु साहको नियुक्ति गरिएको छ ।

किर्ते गरी वडाध्यक्षको दाइलाई नियुक्ति
गत वर्ष औरही गाउँपालिका–२ को प्रवहा देउरी मावि प्रवहामा पनि किर्ते गरी नियुक्ति गरिएको आरोप लागेको थियो । स्थानीयले नियुक्ति बदरको माग गर्दै जिल्ला अदालतमा मुद्दा समेत दर्ता गराएका छन् । मुद्दाको टुंगो लागिसकेको छैन ।

स्थानीय जनार्दन भण्डारीका अनुसार ०७६ पुस ८ गते विद्यालयले कम्प्युटर विषयको शिक्षक माग गर्‍यो । विद्यालयको ‘लेटर प्याड’मा माग गरिएको थियो । पत्रपत्रिकामा विज्ञापन सार्वजनिक गरिएन । अरु कुनै माध्यमबाट पनि जानकारी गराइएन ।

पुस २८ ‘गुपचुप’ तरिकाले वडाध्यक्ष अमितकुमार यादवका जेठा दाइ प्रविनकुमार यादवलाई नियुक्त गरियो । नियुक्तिलगत्तै अरु व्यक्तिलाई तत्काल थाहा नहोस् भनेर माघ ८ देखि उनलाई दुई महिना बेतलबी बिदा दिइयो ।

विद्यालयले शिक्षक माग गरेको पत्रको दर्ता नम्बर ०७६र७७ अन्तर्गत ६३ हो । तर, चलानी नम्बरमा सोही दर्ता नम्बरमा ‘आय व्यय सम्बन्धमा’ उल्लेख गरिएको छ । यसरी आवश्यक कागजात किर्ते गरी वडाध्यक्ष अमितले दाइ प्रविनलाई नियुक्त गराएको आरोप छ ।

विद्यालयका तत्कालीन प्रधानाध्यापक कारी यादव फस्ने डरले सरुवा गराए । कागजात मिलानमा केही त्रुटि देखिए पनि निष्पक्ष रूपमा नियुक्त गरिएको वडाध्यक्ष यादवको दाबी छ ।

“पालिकाको शिक्षा शाखासहितको सहभागितामा नियुक्ति गर्न समिति गठन भएको छ,” उनले भने, “नियुक्ति वडाध्यक्षको क्षेत्राधिकारमा पर्दैन ।” समितिले शिक्षक नियुक्ति गर्न नसक्दा बहुमतको आधारमा गरिएको र पालिकाको कार्यालय तथा टोल–टोलमा विज्ञापन गरेको यादवले बताए ।

दर्जनौँ विद्यालयमा अवैधानिक नियुक्तिको गुनासो

जिल्ला शिक्षा विकास तथा समन्वय इकाइ धनुषाका प्रमुख ईश्वरी ज्ञवालीले दर्जनौँ विद्यालयमा अवैधानिक नियुक्तिको गुनासो आएको बताए ।

उनका अनुसार अख्तियार दुरुपयोग अनुसन्धान आयोग बर्दिबासको कार्यालयले गत साता समन्वय इकाइलाई समेत अवैध नियुक्तिबारे छानबिन गर्न पत्राचार गरेको । छानबिनको जिम्मा कर्मचारीलाई दिइसकेको र केही दिनभित्रै सुरु हुने उनको भनाइ छ ।

धनुषाको नगराईन नगरपालिकामा सबैभन्दा बढी प्रक्रिया नपुर्‍याई नियुक्ति गरिएको गुनासो आएको उनले जानकारी दिए । गएको असार ३० गते नै कार्यालयले नगराईन र धनौजी गाउँपालिकासँग विवरण मागेको छ ।

पालिकालाई पत्राचार
गुनासो बढेपछि जिल्ला शिक्षा विकास तथा समन्वय इकाइ धनुषाले असार ३० गते जिल्लाका सबै पालिकालाई पत्राचार गरेको छ । कार्यालय प्रमुख ज्ञवालीको किर्ते हस्ताक्षर प्रयोग गरिएको पाइए कडा कारबाही गरिने चेतावनी समेत दिइएको छ ।

सम्बन्धित

ताजा अपडेट
प्रदेश सभा: राजेन्द्र महतोको ज्वाईं महासेठको तलब गैरकानूनी, रकम असुलन मलेपको निर्देशन
धनुषामा १२ वर्षिय बालिकालाई बलात्कार गरेको आरोपमा ६० वर्षिय बृद्ध पक्राउ, बलात्कार गरेको भिडियो भाईरल
माओवादीको लालकिलामा एमालेको लहर !

लोकप्रिय

Click Here

हाम्रो बारेमा

khojkendra.com अनलाईन पत्रिकाले नेपालीको साझा आवाजको रुपमा आफ्नो सामाचार सम्प्रेषण गर्ने छ ।

Social Media

टिमहरु

सम्पादक:राजकमल सिंह
सह-सम्पादक:शिबेन्द्र यादव
सल्लाहकार:ईश्वर चन्द्र झा
IT:सुरेन्द्र सिंह (कुशवाहा)

Contact

OBT Media Pvt.Ltd
Bhanu Chauk, Janakpur
Mobile:9801206555
Email:[email protected]