featured photo: खोज केन्द्र

प्रदेश २को प्रदेशसभामा प्रस्तुत भएको निति तथा कार्यक्रमको पक्षमा मतदान गर्न जनता समाजवादी पार्टी संसदीय दलले ह्वीप जारी गरेको छ । मुख्यमन्त्री लालबाबु राउतले बोलाएको जसपा संसदीय दलको बैठकबाट नीति तथा कार्यक्रमको पक्षमा मतदान गर्न ह्वीप जारी गरिएको हो । 

प्रदेश प्रमुख राजेश झाले जेठ २७ गते प्रदेशसभामा प्रस्तुत गरेको नीति तथा कार्यक्रम आज पारित गराउने तयारी गरिएको छ । आजै दिउँसो ३ बजे बस्न लागेको प्रदेशसभा बैठकमा निति तथा कार्यक्रम प्रदेशसभामा निर्णयार्थ प्रस्तुत गरिने प्रदेशसभा सचिवालयका सचिव रंजित यादवले जानकारी दिए । 

जसपा भित्रको असन्तुष्टिका कारण नीति तथा कार्यक्रम पारित नहुने आशंकाका बिच ह्वीप जारी गर्नु परेको जसपाका प्रमुख सचेतक शैलेन्द्र यादवले जानकारी दिए ।

यता जसपा महन्थ–राजेन्द्र पक्षका प्रदेशसभा सदस्य परमेश्वर साहले निति तथा कार्यक्रमको आफूहरुले समर्थन गर्ने जानकारी दिए । उनले निति तथा कार्यक्रमको विपक्षमा नजाने बरु पक्षमै मतदान गर्ने बताए । 

यता नेपाली कांग्रेस सरकारमा शामिल भएपछि केही प्रदेशसभा सदस्यहरु समेत असन्तुष्ट देखिएको श्रोतको दावी छ । यद्यपि नेपाली कांग्रेसका सबै प्रदेशसभा सदस्य पक्षमै मतदान गर्ने सचेतक उपेन्द्र कुश्वाहाले जानकारी दिए । उनले भने ‘आफ्ना सबै प्रदेशसभा सदस्यहरुलाई बैठकमा उपस्थित हुनका लागि भनेको छु, आवश्यक्ता पर्यो भने हामीले पनि ह्वीप जारी गर्नेछौँ ।’