featured photo: खोज केन्द्र

बाराको विश्रापुर गाउँपालिका अध्यक्ष अमिरीलाल राउतलाई पक्राउ गरी कारागार चलान गरिएको छ।

१३ वर्ष पुरानो सवारी ज्यान मुद्दामा फरार प्रतिवादीको आरोप लागेका राउतलाई प्रहरीले आइतबार पक्राउ गरेर कैद भुक्तानीका लागि कारागार पठाएको हो।

जिल्ला प्रहरी कार्यालय बाराका एसपी विकासराज खनालका अनुसार २९ दिन कैद र दुई हजार रूपैयाँ जरिवनाको फैसला कार्यान्वन गर्न राउतलाई पक्राउ गरी कारागार पठाइएको छ।

‘२०६२ सालमा घटेको घटनामाथि २०६३ साल भदौ २९ मा जिल्ला अदालतले २९ दिन जेल र दुई हजार जरिवना गर्ने फैसला भएको रहेछ,’ उनले सेतोपाटीसँग भने, ‘फरार रहेका राउतलाई पक्राउ गरी जिल्ला अदालतमा बुझाइएको छ।’

राउतलाई २९ दिन थुनामा राख्न कारागार पठाइसकिएको खनालले बताए।

‘आजै पक्राउ गरेका हौं। आजै अदालतमा पेश गरी आजै कारागार पठाइएको छ,’ उनले सेतोपाटीसँग भने।