About Contact
०९ मंसिर २०७७, मंगलबार
Close
बिज्ञापन
प्रदेश २ को नाम र राजधानी टुंग्याउन आज मतदान हुंदै

खोज केन्द्र शनिबार, चैत्र ०१, २०७६ मा प्रकाशित

featured photo: खोज केन्द्र

जनकपुरधाम। प्रदेश २ को प्रदेशसभा गठन भएको सवा दुई वर्षपछि आज (शनिबार) स्थायी राजधानी घोषणा हुने करिब निश्चित देखिएको छ । स्थायी राजधानी र नामकरणका लागि प्रदेशसभा सचिवालयले दलहरूको प्रस्ताव दर्ता गरेको ६ महिनापछि शनिबार मतदान प्रक्रियाबाट टुंग्याउन लागिएको हो ।

स्थायी राजधानीको सवालमा दलीय सहमति कायम भइसकेको हुँदा संवैधानिक प्रक्रिया पूरा गर्न मात्रै मतदान गर्न लागिएको प्रदेशसभा सचिवालयका एक अधिकारीले बताए । तर, नामकरण विषयमा अझै दलहरू विभाजित छन् । यसको टुंगो लगाउने प्रक्रिया थप लम्बिन सक्ने अधिकारीले बताएका छन् ।

शुक्रबार बसेको प्रदेशसभा बैठकमा प्रदेशको नामकरण तथा राजधानीसम्बन्धी अध्ययन विशेष समिति सदस्य परमेश्वर साहले दुवै विषयमा गोप्य मतदान प्रक्रियाबाट निर्णय लिन प्रस्ताव पेस गरेका छन् ।

सोही प्रस्तावअनुसार गर्ने गरी शनिबार दिउँसो १ बजे प्रदेशसभाको अर्को बैठक डाकिएको छ । प्रदेशसभा सचिवालयका एक अधिकारीका अनुसार शनिबारै मतदान गराउने तयारी भएको छ ।

प्रदेशसभा सचिवालयले गत ५ भदौसम्म प्रदेशसभामा प्रतिनिधित्व गर्ने दलहरूसँग प्रदेशको नामकरण तथा राजधानी तोक्न प्रस्ताव दर्ता गराउन आह्वान गरेको थियो । सो क्रममा राजधानीका लागि पाँच तथा नामकरणको विषयमा चारवटा प्रस्ताव दर्ता भएको थियो ।

एउटै विषयमा फरकफरक प्रस्ताव आएपछि छलफलको माध्यमबाट निष्कर्षमा पुग्न सभामुख यादवको संयोजकत्वमा ११ सदस्यीय उच्चस्तरीय समिति गठन भएको थियो । विभिन्न मितिमा ११ पटक बैठक बसेको उक्त समितिले राजधानीको विषयमा दलीय सहमति कायम गर्न सफल भयो ।

नामकरणको सवालमा सबै दल आआफ्नै अडानमा अडिग भएपछि निष्कर्षमा पुग्न नसकेको समितिका सदस्य एवं समाजवादी पार्टीका उपनेता रामअशिष यादवले बताए ।

राजधानीको विषयमा सत्तापक्ष दलहरू समाजवादी पार्टी तथा राजपाको संयुक्त प्रस्ताव तथा नेकपा र कांग्रेसको छुट्टाछुट्टै प्रस्तावलाई परिमार्जन गरी एक बनाइएको छ । उनीहरूको सीमांकनबारे फरक मत भए पनि राजधानी जनकपुर (धनुषा) हुनुपर्नेमा एकमत छ ।

बारा र पर्साबाट प्रतिनिधित्व गर्ने विभिन्न दलका सांसदहरूले दर्ता गराएको दुई प्रस्तावमा वीरगन्जलाई राजधानी तोक्न प्रस्ताव गरिएको छ । दलगत रूपमा आएका प्रस्तावमा सहमति कायम भइसकेकाले केही सांसद वीरगन्जकै नाउँमा मतदान गरे पनि जनकपुरलाई स्थायी राजधानी तोकिने करिब निश्चित छ ।

नामको सन्दर्भमा सत्तापक्षका दुवै दलले संयुक्त रूपमा मधेसको नाम अघि सारेका छन् भने नेकपाले जानकी तथा कांग्रेसले मिथिला–भोजपुरा प्रदेश हुनुपर्ने प्रस्ताव गरेको छ । कांग्रेसको अर्को एक पक्षले मध्य मधेस प्रस्ताव गरेको छ । यस आधारमा दलहरू नै विभाजित रहेको हुँदा नामको टुंगो लाग्ने सम्भावना कम देखिन्छ ।

यी विषयहरूमा दलगत रूपले सहमति कायम गरे पनि प्रदेशसभामा प्रतिनिधित्व गर्ने सदस्यहरूको दुई तिहाइ संख्याले अनुमोदन गर्नुपर्ने संवैधानिक व्यवस्था छ ।

संसद्मा चर्काचर्की

तीन महिनापछि शुक्रबार बसेको प्रदेशसभाको बैठकमा मुख्यमन्त्री लालबाबु राउत र प्रतिपक्षी दलका सांसदबीच चर्काचर्की भएको छ ।

प्रदेश २ मा गत आर्थिक वर्षमा प्रदेशसभा सदस्यमार्फत उपभोक्ता समितिद्वारा सञ्चालन गरिएका योजनाको फस्र्योेट हुन सकेको छैन । सोही विषयलाई लिएर सत्तापक्षसमेतका सांसदहरूको अवरोधको कारण तीन महिनादेखि प्रदेशसभाको बैठक बस्न सकिरहेको थिएन । शुक्रबार बसेको बैठकको विशेष समयमा सत्तापक्षसमेतका १० सांसदले भुक्तानीको विषयलाई जोडदार रूपमा उठाएका थिए ।

बैठकमा उठेका विषयलाई सम्बोधन गर्न सभामुख सरोजकुमार यादवले मुख्यमन्त्री राउतलाई निर्देशन दिए । राउतले भुक्तानीमा विलम्ब भएको कुरा व्यक्त गर्न भूमिका बाँध्नै लाग्दा प्रमुख प्रतिपक्षी दल नेकपाका सांसद रामचन्द्र मण्डलले सीधासीधा जवाफ दिन भन्दै बीचमै बोलेपछि विवाद भएको थियो ।

मुख्यमन्त्री राउतले भुक्तानीमा ढिलाइ हुनुको कारण सरकार होइन भनेपछि प्रदेशसभा सदस्य मण्डलले ‘भूमिका नबाँध्नुस् भुक्तानीमा ढिलाइको कारण के हो त्यो सीधासीधा भन्नुस्’ भन्दै आपत्ति जनाएका थिए ।

सम्बन्धित

ताजा अपडेट
जनकपुरमा मुसहर बालबालिकाहरुलाई न्यानो कपडा वितरण
समाजसेवामा जनकपुरका वडा अध्यक्ष साह, सहयोग जुटाएर श्रध्दालुलाई छठ सामग्री बितरण
नेशनल इन्जिनियर्स एशोसिएसन नेपालको प्रथम प्रादेशिक भेला जनकपुरमा सम्पन्न

लोकप्रिय

Click Here

हाम्रो बारेमा

khojkendra.com अनलाईन पत्रिकाले नेपालीको साझा आवाजको रुपमा आफ्नो सामाचार सम्प्रेषण गर्ने छ ।

Social Media

टिमहरु

सम्पादक:राजकमल सिंह
सह-सम्पादक:शिबेन्द्र यादव
सल्लाहकार:ईश्वर चन्द्र झा
IT:सुरेन्द्र सिंह (कुशवाहा)

Contact

OBT Media Pvt.Ltd
Bhanu Chauk, Janakpur
Mobile:9801206555
Email:[email protected]