About Contact
०९ माघ २०७७, शुक्रबार
Close
बिज्ञापन
राजर्षि जनक विश्वविद्यालयमा कानून र जनस्वास्थ्य पढाई हुने

खोज केन्द्र सोमबार, माघ २०, २०७६ मा प्रकाशित

featured photo: खोज केन्द्र

जनकपुरधाम– राजर्षि जनक विश्वविद्यालयले चालु शैक्षिक सत्रमा कानून र जनस्वास्थ्य विषयको स्नातक तहको अध्ययन शुरू गर्ने भएको छ। नयाँ शैक्षिक योजनाअन्तर्गत ती दुवै विषयको अध्ययन अध्यापन गराउन प्रक्रिया अगाडि बढाइएको जनाइएको छ।

जनस्वास्थ्यको बिपिएच र कानूनतर्फ बिएलएलबी शुरू हुने छ। यी विषयको अध्ययनले यस भेगका शिक्षार्थीले अन्यत्र गई अत्यधिक व्ययभार व्यहोर्नुपर्ने बाध्यताको अन्त्य हुने विश्वास लिइएको छ। शिक्षार्थीलाई कम व्ययभार हुने शुल्क निर्धारण हुने जनाइएको छ। जनस्वास्थ्य विषयमा अध्ययन आवेदनको सूचना प्रकाशित भइसकेको छ। कानून विषयको स्नातक तहको पाँच वर्षे नयाँ पाठ्यक्रम तयार गरिएको बताइएको छ।

उपकुलपति प्राध्यापक भरत झाका अनुसार शिक्षालाई प्रतिस्पर्धी, प्रविधिमैत्री, रोजगारमूलक र उत्पादनमुखी बनाई आवश्यकताअनुरूपको मानव संसाधन विकास गर्ने लक्ष्य लिई विश्वविद्यालयले करिब अढाइ वर्षमा चार वटा विषयको शिक्षा दिइरहेको छ।

सोअन्तर्गत बिबिए, बिएससी सीएसआइटी, बिसिए र बिएससी एमएलटी विषयमा २०० शिक्षार्थी अध्ययनरत रहेका छन्। विश्वविद्यालयको आफ्नो भवन नभएका कारण भाडामा लिई कक्षा सञ्चालन गर्नुपरेकाले शिक्षार्थीको आवेदनअनुरूपको सङ्ख्यालाई शिक्षा दिन नसकिएको अवस्था रहेको छ। विश्वविद्यालयमा एमबीए विषयको पढाइको गृहकार्य भइरहेको जनाइएको छ।

विश्वविद्यालयको पूर्वाधार विकासका लागि विभिन्न स्थलको सम्भाव्य अध्ययन गरिएको छ। सम्भाव्य अध्ययन गरिएका स्थलमध्ये मणिमण्डपको २४ बिघाको क्षेत्रफल र फूलगामाको क्षेत्र विचाराधीन रहेको छ। आवश्यकताअनुरूपको मानव संसाधन विकासअन्तर्गत आगामी दिनमा सो विश्वविद्यालयमा आँखासम्बन्धी शिक्षा शुरू गर्ने योजनासमेत रहेको छ।

जनस्वास्थ्य विषयको स्नातक तहको शिक्षाले गति लिइसकेपछि आँखासम्बन्धी शिक्षाको थालनी सोच रहेको उनले जानकारी दिएका छन्। त्यस्तै कृषिसम्बन्धी स्नातक तहको शिक्षाको पूर्वाधार विकासका लागि विज्ञसहितको टोलीले सिरहा जिल्लामा सम्भाव्य अध्ययन गरेको छ। आगामी दिनमा मिथिला भूमिको दर्शन र चिन्तनलाई जीवन्त राख्न प्राच्य दर्शन र मिथिला कला विषयमा समेत शिक्षण गरिने योजना रहेको जनाइएको छ।

सम्बन्धित

Click Here

हाम्रो बारेमा

khojkendra.com अनलाईन पत्रिकाले नेपालीको साझा आवाजको रुपमा आफ्नो सामाचार सम्प्रेषण गर्ने छ ।

Social Media

टिमहरु

सम्पादक:राजकमल सिंह
सह-सम्पादक:शिबेन्द्र यादव
सल्लाहकार:ईश्वर चन्द्र झा
IT:सुरेन्द्र सिंह (कुशवाहा)

Contact

OBT Media Pvt.Ltd
Bhanu Chauk, Janakpur
Mobile:9801206555
Email:[email protected]